كية في قلبي
كية في قلبي ما زالت تحرق
لوعة في خاطري ضالة تشهق
على أيامي اللي فاتو كي البرق
على الشمس اللي ما بغات تشرق
وعلى الواد اللي ما عاد يرقرق
ما نفعني على هولي حتى صبر
ما خيرت أبدا أنروح
ما خيرت أبدا أنّوح
من الغربة راني مجروح
بقيت ساكت و ما قدرت أنبوح
بسري و حزني و الجروح
غلبني أمري سقمي و الضرّ
بكيت كي قطعت البحر
و قلت ما عندي الزهر
قعدت و قابلت القمر
وعيوني بالدمعات تنهمر
هذا حكم الله و القدر
دعاي كل يوم وليلة القدر
عيني تدمع بالسكات
دمعتي تجري زخّات
فكري ما بقالو تبات
وعقلي دايمن في حيرات
هذا قدري يا سادات
جرّعت السموم الاهوال و المرّ
يا حسراه على ليّام الزينة
في باتوفاني بلاست العود و الجنينة
من القصبة لدار السلطان أمشينا
وفي باب الواد المالو والهوى يدّينا
في لبياركاين حبيبي خويا و يمّا لحنينة
توحّشت البر و البحر و ضي القمر
من القصبة لبرج بوليلة
عندي حكايات ألف ليلة وليلة
عندي ذكريات وتولويلة
عندي تفكيرات طويلة
كلام يجري كي لعسيلة
في جلسات زاهية تعجب النظر
