البارح شفت في منامي
عدرة شابة قدّامي
تلفلي قولي و كلامي
وما رديت حتى سلامي
ذاك الزين اللي جاء ساماني
الثغر باين و وضاح
كي اتشوفو العين بالسيف تستراح
و يعود الخاطر في الانشراح
في منامي كنت بلا سلاح
ذاك الزين راهو غواني
العين سودة مرسومة
الاشفار فاطنة ماهي مهمومة
الحواجب كاملة كالسهومة
و بينهم النظرة ماهي مكمومة
ذاك الزين ما هناني
الجبين بالبهاء ضاوي
يسبي العارف و الهاوي
و يصرالو ما صرا للكاوي
حتى اذا ما كان في قصدو ناوي
ذاك الزين وين أدّاني
الشعر متلوق و سارح
أسود على الاكتاف مارح
كي لحرير على الصدر طايح
و قبالو الطير صايح
ذاك الزين لاش أبلاني
النيف رهيف و مقدود
الفم باسم ماهو مشدود
و الضحكة ما فيها صدود
شفايف باينين كأنهم زمرود
ذاك الزين أعلاش جاني
الوجنات ظاهرة عكرية
على الخدين يا ذيك لبلية
و خانة على الوجه سرية
ما يشوفها غير اللي اقرّب شوية
ذاك الزين يا ترى يهواني
النهود على الصدركي المرمر
زادو في شوقي مالي صبر
القد ممدود يعجب في النظر
ما شفتو عند البدو ولا عند الحضر
ذاك الزين ما سقساني
طال عليّ الحال و أنا في تخمام
و أنا في جلستي مع زينة لريام
حليت عيني بعد الهيام
و قلت يا من درى يقظة و لا منام
ذاك الزين كان يستناني
هاذ القمرية حسنها فتّان
ما يقدر على وصايفها حتى إنسان
لا شاعربكلامو و لا نحّات فنان
هاذ البهاء وحدو في الزمان
ذاك الزين ما عمرو أنساني
لونجة عشقها أبهرني
الغنجة هواها أداني
اللّبة غرامها أملكني
البهجة بحرها أسحرني
ذاك الزين أعذروني فيه يا خواني
http://algeriacolor.com/dance_algeroise.htm
