شاق خاطري
شاق خاطري ليك يا بابا الغالي
يا اللي رحت بعيد و سكنت لعلالي
عند مول القدرة ربي العالي
يا بابا ما عمرك غبت من بالي
نويت انراك في منامي
نويت انقولك في كلامي
نويت نهديلك سلامي
نويت نشوفك قدّامي
نويت نعطي دنيتي و مالي
حملي ثقلي و رحالي
باش انرى صورتك قبالي
و اجاوبني على قرحتي و سؤالي
يا حسراه كي كنت أنت الوالي
تغفى عينك و انت ما راك سالي
تفاقد الدراري الاول و التالي
راقدين على مخايدهم بالتوالي
نشفى على ليّام و انقول واش اصرالي
نتفكّر الضحكات و انقول يا مالي
نستحضر القعدات و انقول يا دلالي
معاك يا بابا على نغمة البروالي
ما بقاو غير تذكيرات زماني
يروحوا و ايجوا يا تشطاني
البارح كان زمان سلطاني
قالها باتي و قروابي و بابا بكّاني
بكيت اعليك شحال في ايامي
دعيتلك كذا في صيامي
سلت عليك حتى اللي ماهم قوامي
ما نطقوا ما ردّوا من أفوامي
طاحت دمعتي على زهري
و عيني ما سكّتت اللي في صدري
حزن بابا و وطني قدري
زوج كيات نيرانهم في قلبي تسري
ربي يا العالم بضري و احوالي
استجب لدعوتي بكايا و قوالي
زوّل عليّ غمي و هوالي
و اغفرلي ذنبي في ظلمة الليالي
